士安力的蛇貓狗

高息入定低息入: 買樓之迷思

香港人近乎買任何野都好似無知羊群一般, 大圍 hit 就唔理平貴都買左先, 跌到一個超平價反而無人敢入; 但係就係因為呢個分別, 細戶多數損手離場, 大戶經常會有賺. 但係我今次只係單單想講買樓.

家下仍在加息周期, 每次加息香港樓市總會跌一跌, 甚至可以成個屋苑一個月唔發市都夠膽死, 業主驚死自己間樓再跌多D於是主動落價求售, 準買家怕再加息每個月要供多D, 想賣賣唔出, 想買唔敢買, 一池死水; 但係我想問一個問題, 趁息口低果時買既買家, 今日比既係咩息咩? 無錯, 係今日既息口. 咁買樓既樓價呢? 係當日人人爭住買果時較高既樓價.

既然息口係常變既, 無論你買果時息口高定低, 都一樣會跟市場調整, 即係話你晌息口低果時買, 只係著數左息口較低果幾個月既息差, 以普羅大眾既百幾萬樓價計, 真正著數不過係幾千蚊之譜, 即係話息高同息低時買樓其實分別無大部份人所諗咁大分別, 息低時買樓亦唔會著數好多, 最緊要係銀行比你既利率係最優惠利率減幾多(依家好多都仲可以做到最優惠利率減2.25%或更低, 可以問想熟銀行或問多幾間).

至於樓價, 唔使我教, 既然息口原來無我地想像中影響咁大, 大家又知道晌邊一刻可以以較低價買到樓, 作為一個精明既買家, 邊一刻買可以賺得番息高果幾千蚊差額大家心照啦; 人求你買既感覺點都好過你求人賣, 係唔係

生活回應的RSS 回應(2) 暫時未有引用通告 (0)
2005年12月27日

電腦不死小貼士

以前用電腦好煩, 大約半年就要鏟一次機. 鏟之前除左部機已經半死之外, 又要搞 backup, 鏟完機又要將D野裝番, 仲要搞呢樣搞果樣, 部機用得順果時就係鏟機既時候….

根據我後知後覺既經驗話比我知, 部機慢主要因為軟件裝裝拆拆更新升級令 registry 多垃圾而又雜亂無章, 再加上依加好多 spyware 令部機慢上加慢, 另外唔做磁碟整理亦係一大忌; 咁即係點搞好呀?

我唔鍾意直接比條 link 比人(除非一D好騎呢既情況), 我始終認為去 google 或者 yahoo 度搵唔係一件咁難既事.

Ccleaner 可以幫你清晒 registry 大部份既垃圾, 使用簡單唔使用腦之餘仲唔使錢, 又有唔同語言介面, 仲識得自動更新, 只要你識字, 就會識得用

Spybot search & destroy 可以幫你清晒大部份既 spyware, 仲有防疫功能(唔好問我點防疫, 唔好諗住用針筒同部腦吉針), 而且又係有唔同語言介面同自動更新之餘又係免費, 實在令人開心

用左呢兩個 sw 之後, 原則上你只要一個月同部機做一次 defrag, 部機就會乖乖地唔會再死…. 得咁快. 而如果你用 diskeeper 呢類功能更好既 defrag 軟體, 部機就會更加穩定. 自從用左呢個方法之後, 我部機超過一年無鏟過, 中間仲要不停裝 sw, 而效能仍然同鏟完機之後一樣咁快一樣咁穩定.

你可能會問: 無拿? 咁少野就得? 係呀, 就係咁易架咋, 易D唔好咩? 當然仲有好多其他方法, 不過呢個方法最易又唔使錢效果又唔錯, 至於D大師級人馬, 便唔好同我去計果幾個%既差別矣

電腦回應的RSS 按此回應暫時未有引用通告 (0)
2005年12月25日

陳日君真肉酸

呀陳主教話警隊犯下幾樣重既錯誤, 以下節錄出自最撐呀陳主教既生果報.

1)因示威者表示友好而失去危機感 2)縱容示威者無晌頭兩日就拉左果幾件搶盾牌既人 3)安排女警打頭陣 4)警員保護不足 5)唔叫晒全港所有差佬去灣仔晒馬 6)星期六果日無警句就拉左九百幾人唔合情理 7)高層無檢討過失只顧領功

連生果報都寫到前後犯駁左右互打, 你話呀陳主教幾有道理喇, 唉….

呀陳主教最初話D差佬果日拉九百幾人可恥, 又呢樣又果樣, 比D前線差佬插佢就即刻笠水話淨係指高層決策錯誤, 仲話班南韓佬係和平示威者無理由拉佢地云云. 咁橋果個我差唔多成日坐住晌公仔箱面前, 左無線右亞視咁睇住成件事點發生(我唔係變態既, 除左電視我部電腦都可以睇到電視, 所以先可以同時睇兩個台), 再加埋之後新視聞透視等等既節目, 根本知道佢地係立心衝擊班差佬既防線. 我問番轉頭, 班差佬可以點做? 放你班友直鏟入會場呀? 同你開埋路好唔好?

搶盾我都當算數, 搶左個盾牌其實都唔做得D乜. 搶鐵馬, 之後拆成一支支咁鏟向差佬度, 咁唔通算係和平示威? 咁晌呢個情況大家認為差佬應該點做? 企晌度等你地掟D鐵馬過黎好唔好? 最尾班差佬都只係擺左個陣出黎, 噴左好多支胡椒噴霧, 同掟左幾個吹淚旦, 仲做過D乜?

好喇, 衝唔過防線, 佢地決定靜坐晌路中間, 咁既情況班差佬圍住你地好理所當然丫, 一陣你地又黎一野大反抗邊反應得切呀. 之後差佬話要拘捕班友, 好奇怪喎, 原本話要靜坐通頂既佢地, 未夠六點就話差佬無野比佢地食呢樣無果樣無, 豈不怪哉?

南韓農民有佢地難處, 大家相信晌呢排不停咁聽電視講, 唔知多都知少, 亦都明白佢地點解咁激, 為乜玩到咁大; 但係香港警察都有佢地難處, 佢地都有佢地職責, 點解我地只同情南韓佬而唔諗下我地香港既警察呢? 世界上好多事都係公說公有理, 婆說婆有理, 根本無話邊個錯晒邊個著晒, 甚至可能其實兩邊都無錯, 不過係大家立場有所不同矣.

我認為今次警隊雖然處理得唔係十全十美, 但係一D都無失禮人; 至於陳日君雖然唔係全部錯晒, 但係實在十分失禮人.

老懵左, 就好收皮啦, 仲咁多口水

時事/新聞回應的RSS 回應(1) 引用通告(1) (0)