士安力的蛇貓狗

從前有兩隻小豬，整天過著無憂無慮的生活，他們互相相愛著。每天主人送來吃的時候，公豬總是先讓母豬吃,等她吃飽了再上去吃母豬吃剩下的東西，每天晚上公豬總是給母豬放哨，他生怕主人乘他們熟睡時把母豬拉出去宰了。

日子一天天的過去，母豬日漸長胖，而公豬則一天天瘦下去。有一天，公豬突然聽見主人在跟屠夫商量，要把長勢見長的母豬殺了給賣掉，公豬傷心至極。於是從那天開始公豬性情大變，每當主人送吃來時公豬總搶上去把東西吃的一乾二淨，每天吃後便躺下大睡，並且告訴母豬現在換做她來放哨，如果他發現她沒放哨的話就再也不理她。

漸漸的日子一天天過去，母豬覺得公豬越來越不在乎她，母豬失望了，而公豬還是若無其事的過著安樂日子．很快一個月過去了，主人帶著屠夫來到豬圈，他發現一個月前肥肥壯壯的母豬瘦的沒剩下多少肉，而公豬則長的油光發亮．這時的公豬拼命的奔跑，想引起主人的注意，表明他是頭健康的豬。

終於，屠夫把公豬拖出豬圈的那一刻，公豬朝著母豬笑著說：『以後別吃這麼多！』母豬傷心欲絕，拼命的沖出去，但圈門被主人關上了，擱著柵欄，母豬看著閃著淚光的公豬。那晚，母豬望著主人一家開心的吃著豬肉，母豬傷心的躺倒在以前公豬每天睡的地方，突然她發現牆上有行字：

『如果愛無法用言語來表達，我願意用生命來證明』！

母豬看到這行字肝腸寸斷，人類聽到這個淒美的愛情故事也無不為之動容，女孩們為了紀念這段愛情，同時也表示沒忘記公豬臨前的遺囑『以後別吃這麼多』，開始流行減肥……

 日記  回應的RSS 按此回應  暫時未有引用通告   (0)
2006年01月24日

政苦話為左千千萬萬個服務行業從業員健康, 唔可以唔禁煙; 從業員話為左以後仲可以有工開唔使加入失業大軍, 點都唔可以禁煙.

政苦話禁左煙, 酒吧麻雀館桑拿浴室生意會好D; 酒吧麻雀館桑拿浴室話如果真係禁煙到時搵鬼人去.

酒吧麻雀館桑拿浴室目標市場煙民居多呢個係事實, 政苦想完全禁煙呢個亦係事實, 立場本身對立, 又有乜野可以傾到出黎? 政苦搞禁煙搞左咁多年竟然搞左個煙民年輕化出黎, 呢班人又正正係果D酒吧麻雀館桑拿浴室的主要客仔, 你搞禁煙又真係迫人摺埋架咋喎.

最陰公係政場上果班政棍行為幼稚, 以為叫大聲D企得硬D就叫有料到, 個個得把死人聲毫無實際辦事能力, 你話, 呢個死結可以點解決呢?

政苦呀政苦, 既然你一心打市民牌, 就出多幾錢肉緊啦, 吸煙者尚未被足夠地抹黑, 統戰部仍需努力呀!

 時事/新聞  回應的RSS 回應(1)  引用通告(2)   (0)

相信有睇開呢個blog的朋友都知道我非常討厭家下財務機構的運作及宣傳方式, 因為佢地如此做生意, 不過係引誘大家過份消費, 於是乎佢先有機會向閣下荷包開刀收其高息. (當然我自己都係受害者之一) 好喇, 如果真係咁唔好彩你已經成為重債債仔一員, 一個月搵得果八九千, 但係要還六七千至少, 食都唔夠食, 感到生不如死, 咁點搞好呢? 就等我呢個過來人教下你可以點做.

如果你欠債唔算太多 (約等於月薪八倍以下), 你可以考慮直接同有關財務機構商討債務重組事宜, 因為各財務機構其實都知道佢地自己做左乜野好事, 不知幾咁驚D債仔無錢還, 所以你同佢傾, 只要你有誠意, 佢就可以同你攤長期數仲減低D息, 同時晌信貸資料庫亦都會見到你條數做緊債務重組, 晌重組期間你就唔可以再借到任何錢. 好處係還完之後基本上你唔會有任何記錄話你做過債務重組, 部份銀行亦都會晌重組後照比信用咭比你, 甚至成為特選客戶. 唔好處就係你供樓供車可能要比高D息都唔定, 睇個別銀行做法喇.

如果你欠債有番咁上下 (差唔多去到月薪廿倍), 你都可以同銀行傾, 但係你會還得辛苦好多. 另外亦可以做 IVA, 有律師做中間人幫你搞, 但係呢個選擇會有D風險, 一陣再講.

若果你真係差到一屁股債, 月入一萬, 要還萬三 (可能因為轉左工人工少左, 或者乜野原因都好令收入少左頂唔到條數), 條大數仲要係月入廿幾卅倍, 相信你都無乜其他選擇可以諗, 就係破產. 破產晌好多人心目中都可能好得人驚, 但係對極大部份升斗市民黎講係影響唔大, 甚至你可能報完破產你呢四年之內一毛錢都唔使還比債權人 (你睇章小惠就係一個好例子). 但係破產政府要先收港幣一萬元正先會開始做野, 若果你交比律師幫你搞就要另加律師費 (正路就港幣一千至五千元不等), 即係話你想破產, 除非有關債權人向法庭申請你破產, 你如果係自己想破, 就要先比萬幾蚊出黎先. 破左之後, 原則上你唔使話比任何人聽, 包括你老闆, 但係如果你係公司管理層, 或者晌金融機構度做 (銀行, 證券行, 會計, 保險等等), 就一定要申報, 情況差到可能真係連工都無埋要轉行都唔定. 而如果你收入唔多, 又要租樓又有小朋友, 除非你搵三幾萬一個月, 若果人工大約萬幾, 都有幾大機會一毛錢都唔使比或者只要比二三千. 總比你一個月還萬幾輕鬆.

頭先有講話 IVA, 呢樣多數都要搵 CFP 或律師行搞, 但係 IVA 收的行政費非常多同非常貴, 可能做完之後你不過係由還一萬幾變成還八千 (實還六千, 有千幾係 IVA 行政費), 而且有可能 IVA 債權人唔接受都唔定, 到時你錢又比左(IVA要收差唔多兩萬收費, 仲要另外每月比行政費), 又 IVA 唔到, 仲要另外比錢破產你就真係超級大鑊喇.

仲有, 無論 IVA 定係破產, 有部份財務機構 (大部份大銀行, 幫聞), 只要你入紙申請, 就唔會搵人追數. 但係有少部份財務機構 (細銀行, 呀周聯合), 見到紙會仲追緊D, 至到正式出 IVA或者法庭已經宣佈當事人破產, 呢樣要有心理準備.

 生活  回應的RSS 按此回應  暫時未有引用通告   (0)

呢套戲未上畫已經有興趣想睇, 因為喼神放聲氣話呢套野係根據佢自己的經歷而改篇. 今日終於睇左 VCD

故事好簡單, 主角比狗仔隊追住黎拍, 追到主角撞車屋企人入晒廠, 於是向果幾個狗仔隊實行報復大計.

以美國片黎講, 呢套野算係短 (不足100min), 節奏算緊湊, 作為娛樂算係唔錯. 片中狗仔隊見錢開眼不理他人生死, 現實係唔係咁我唔清楚, 但相信總有呢D人, 正如片中狗仔隊令主角一家人撞車, 情節就好似戴安娜撞車一事的翻版, 喼神相信正係講緊呢種狗仔隊.

雖然同果幾個狗仔隊埋單好似唔太現實, 但係為左表達對狗仔隊的怨恨而拍一套戲, 真係要講一句 “喼神你好野”

 電影  回應的RSS 按此回應  暫時未有引用通告   (0)
2006年01月23日

還記得當年睇動畫版, 真係睇到眼濕濕. 故仔重點講清太同節子兩兄妹如何晌戰亂之中, 好似螢火虫一般無聲無息消逝.

真人版故事時間長好多, 人物多好多, 支節多好多, 重點人物落在動畫中十惡不赧的舅母.

原則上故事無乜點變過 (因為無論真人版定係動畫版都係改篇自小說), 真人版相比之下少了一點感人, 多了一分對戰爭的無力感及無奈. 清太節子兩兄妹不過係成千上萬失去生命之戰亂受害者其中之一, 舅母為著自己子女生存不得不做惡人但係到死都放唔開兩兄妹因佢一家而死, 無人希望戰爭, 但有人知道自己兵敗如山倒仍照上戰場.

睇完之後, 心中只留下一個極大的問號, 同埋好討厭所有國家推行的愛國政策.

 電影  回應的RSS 按此回應  暫時未有引用通告   (0)
2006年01月21日

大家都拎左最雞男女歌手就唔好狗咬狗骨啦

 娛樂/影視  回應的RSS 回應(2)  暫時未有引用通告   (0)
2006年01月18日

對幾日見到有影評人話鋼煉劇場版昆水, 無前文後理, 故仔世界觀混亂, 只滿足睇晒電視版鋼煉的朋友, 一眾未睇過或未睇晒電視版的朋友只會一頭霧水, 全無誠意可言.

日本的娛樂媒體的市場策略比起香港好得多, 好少會好似香港咁將一條橋玩到爛晒先放手 (近日李笑好就係一個玩爛橋的最佳例子), 晌套野未見光已經計劃好晒幾時出D乜出黎. 但係劇場版的出現, 就正正係果個影評人所講, 只針對睇過電視版果堆人黎做, 而唔會考慮點去交代前文後理, 因為劇場版好多時都係一個 “畫公仔畫出腸”, 將電視版結局未有交代之事情全部講得清楚明白的電影, 呢個就係日本人將條橋玩盡的方法. (特攝片的電影版用途有所分別, 如有機會另文再述)

至於電影版晌電視完左之後先上, 而唔係好似部份特攝片咁, 連電視版都未晌香港廣播過, 就夾硬用唔同媒體唔同方法去賣錢, 已經算得上係有良心.

所以你唔會見到愛德教中英日韓德法意文, 亦唔會見到艾爾出黎教大家化學. 條橋點玩, 都只會由邊度黎, 就晌邊度去, 所以就用劇場版將條橋玩盡. 一個唔晌故事世界的故事主角, 便只是一個空殼, 這是我的見解.

相信無人會睇電視劇大結局時, 因為自己無睇之前廿集, 就大罵大結局交代不足無頭無尾. 同理, 果個影評人連人地套野的市場策略同文代差異有乜分別都唔知就一副專家咀臉說三道四, 除左自大同無知外, 仲會係乜野原因呢….

對於未睇過電視版鋼煉的朋友, 你真係唔好去睇劇場版, 免得浪費時間金錢, 一陣你得出同果個影評人同樣結論, 而身邊朋友又睇得勁興奮仲問你好唔好睇時, 你真係會 O 晒咀唔知點答好

 電影  回應的RSS 回應(2)  暫時未有引用通告   (0)
2006年01月18日