士安力的蛇貓狗

咒語晌人類民智未開之時已經出現, 內容來來去去唔係咒人就係召喚鬼神, 再唔係就係做和事佬止息風波. 情人節將至, 見身邊一眾豬朋為左身邊之雌性另一半晌二月十四日果十幾廿支, 平日賣幾十蚊都賺貴但係當日賣到成差野都未必有得賣既花而苦惱, 於是將多年前狗友所傳授之秘傳極大咒文同一眾苦海中之男仕分享, 用完如果試過真係有效, 唔使多謝我, 損錢比保良局吧!

使用呢個極大咒文時, 你最好用你自己的方法(剪書, 上網搵, 點都好啦), 搵一張以大家讀書時一定見過的花朵橫切面圖, 最好黑白, 比人的感覺要專業一點, 學術一點.

念咒文對像, 因為要效果永遠持久, 你念呢個極大咒文, 絕對唔係求神拜佛, 唔係召喚精靈, 而係要向目標人物作出直接咒文咏唱, 先會有效果. 你唔好以為對住街邊隻貓念就可以有效, 或者希望隻貓幫你傳送咒文

至於使用方法, 如果你想效果好D, 就面對面將個極大咒文對住對方念一次, 如果驚自己念果時定力唔夠, 你可以用 email, 又或者寄信都可以(寄信最好手寫), 但係當然效果差一皮啦. 而且你要確保將整篇極大咒文都傳送到當事人耳邊或眼前, 只接收到一半, 佢就會好似家下D鬼打病毒咁, 有抗藥性, 咁就效果打晒大折扣矣.

講左咁耐, 咁篇極大咒文係乜呢? 你最好背熟佢先囉. 好容易, 一手拎住一支花, 另一隻手拎住頭先講果張花的橫切面圖, 再向目標人物咏唱以下咒文, 包掂!

植物之花, 極其美麗, 勾魂攝魄, 群雌莫敵;
究其底蘊, 極度嘔心, 尚且由我, 指點眾生;
花之作用, 吸引昆虫, 色彩斑爛, 芬香迷人,
究其原因, 傳播花粉, 傳宗接代, 全靠他人;
簡而言之, 花雖引人, 諗深一層, 性器為實,
內有雌雄, 仲有花粉, 當中奧妙, 由君發掘;
情人佳節, 本當同慶, 可憐花兒, 有苦自知,
互送性器, 仲要鬥多, 再鬥包裝, 實為花禍,
拎近鼻前, 大力一索, 情況嘔心, 自己想像,
取人性器, 鬥生鬥死, 所為何事, 於心何忍.

我試過向我老婆施以呢個極大咒文, 家下我送花比佢, 佢會鬧番我轉頭, 話我核鬼突, 我便覺得我好鬼死成功.

 愛情  回應的RSS 按此回應  暫時未有引用通告   (0)
2006年02月12日