士安力的蛇貓狗

以前我覺得舊歌比新歌好聽, 係老餅的特徵之一; 但係唔知幾時開始, 我都變成左老餅一塊. 與其話喜歡舊歌, 不如話舊歌會令人勾起特定的回憶, 太多事情過去後就無可能再番轉頭, 即或重回舊地, 只感到風景尚不能依舊人面豈能不全非

太陽星晨: 我不時會同老頭子去泳池游水, 游完之後會買一隻熱狗食. 果隻熱狗的味道已經唔易搵到, 但真係非常好味. 通常我都會買多本 “笑旦漫畫” (本野應該係鄭旦瑞做老闆)

鋼琴後的人: 我自己買的第一合帶, 部機係 AIWA, 發覺乜野係音體聲

海闊天空: 當年我六年級, 開開心心去烏溪沙入教育營, 咁大個仔第一次咁長時間離開屋企(四日三夜), 感覺上明明好似唔係好耐之前發生.

我愛 IChiBan: 我第一次整擴音機(D&T功課), 不停咁播呢首歌黎試部機. 懷疑因為當年自己真係整得太好, 今時今日的音響硬係聽唔上耳.

那有一天不想你: 時至今日對我仍然係一個夢魘

從沒這麼愛戀過: 一首我唔多喜歡的歌, 呢首歌真係一個單純的 time stamp

請放手: 首歌其實真係幾好聽.

一個人的天荒地老: 我做左一件我後悔至今的事

原來你甚麼都不要: 我學識飲酒, 仲非常鍾意飲

The Phantom of the Opera: “有錢佬品味, 死窮鬼身家” 的終極開始

往事, 又點可以如煙呢, 明明感覺上所有事情不過係前兩日發生….

 家庭  回應的RSS 按此回應  暫時未有引用通告   (0)
2006年03月16日

從前有兩隻小豬，整天過著無憂無慮的生活，他們互相相愛著。每天主人送來吃的時候，公豬總是先讓母豬吃,等她吃飽了再上去吃母豬吃剩下的東西，每天晚上公豬總是給母豬放哨，他生怕主人乘他們熟睡時把母豬拉出去宰了。

日子一天天的過去，母豬日漸長胖，而公豬則一天天瘦下去。有一天，公豬突然聽見主人在跟屠夫商量，要把長勢見長的母豬殺了給賣掉，公豬傷心至極。於是從那天開始公豬性情大變，每當主人送吃來時公豬總搶上去把東西吃的一乾二淨，每天吃後便躺下大睡，並且告訴母豬現在換做她來放哨，如果他發現她沒放哨的話就再也不理她。

漸漸的日子一天天過去，母豬覺得公豬越來越不在乎她，母豬失望了，而公豬還是若無其事的過著安樂日子．很快一個月過去了，主人帶著屠夫來到豬圈，他發現一個月前肥肥壯壯的母豬瘦的沒剩下多少肉，而公豬則長的油光發亮．這時的公豬拼命的奔跑，想引起主人的注意，表明他是頭健康的豬。

終於，屠夫把公豬拖出豬圈的那一刻，公豬朝著母豬笑著說：『以後別吃這麼多！』母豬傷心欲絕，拼命的沖出去，但圈門被主人關上了，擱著柵欄，母豬看著閃著淚光的公豬。那晚，母豬望著主人一家開心的吃著豬肉，母豬傷心的躺倒在以前公豬每天睡的地方，突然她發現牆上有行字：

『如果愛無法用言語來表達，我願意用生命來證明』！

母豬看到這行字肝腸寸斷，人類聽到這個淒美的愛情故事也無不為之動容，女孩們為了紀念這段愛情，同時也表示沒忘記公豬臨前的遺囑『以後別吃這麼多』，開始流行減肥……

 日記  回應的RSS 按此回應  暫時未有引用通告   (0)
2006年01月24日

相信有睇開呢個blog的朋友都知道我非常討厭家下財務機構的運作及宣傳方式, 因為佢地如此做生意, 不過係引誘大家過份消費, 於是乎佢先有機會向閣下荷包開刀收其高息. (當然我自己都係受害者之一) 好喇, 如果真係咁唔好彩你已經成為重債債仔一員, 一個月搵得果八九千, 但係要還六七千至少, 食都唔夠食, 感到生不如死, 咁點搞好呢? 就等我呢個過來人教下你可以點做.

如果你欠債唔算太多 (約等於月薪八倍以下), 你可以考慮直接同有關財務機構商討債務重組事宜, 因為各財務機構其實都知道佢地自己做左乜野好事, 不知幾咁驚D債仔無錢還, 所以你同佢傾, 只要你有誠意, 佢就可以同你攤長期數仲減低D息, 同時晌信貸資料庫亦都會見到你條數做緊債務重組, 晌重組期間你就唔可以再借到任何錢. 好處係還完之後基本上你唔會有任何記錄話你做過債務重組, 部份銀行亦都會晌重組後照比信用咭比你, 甚至成為特選客戶. 唔好處就係你供樓供車可能要比高D息都唔定, 睇個別銀行做法喇.

如果你欠債有番咁上下 (差唔多去到月薪廿倍), 你都可以同銀行傾, 但係你會還得辛苦好多. 另外亦可以做 IVA, 有律師做中間人幫你搞, 但係呢個選擇會有D風險, 一陣再講.

若果你真係差到一屁股債, 月入一萬, 要還萬三 (可能因為轉左工人工少左, 或者乜野原因都好令收入少左頂唔到條數), 條大數仲要係月入廿幾卅倍, 相信你都無乜其他選擇可以諗, 就係破產. 破產晌好多人心目中都可能好得人驚, 但係對極大部份升斗市民黎講係影響唔大, 甚至你可能報完破產你呢四年之內一毛錢都唔使還比債權人 (你睇章小惠就係一個好例子). 但係破產政府要先收港幣一萬元正先會開始做野, 若果你交比律師幫你搞就要另加律師費 (正路就港幣一千至五千元不等), 即係話你想破產, 除非有關債權人向法庭申請你破產, 你如果係自己想破, 就要先比萬幾蚊出黎先. 破左之後, 原則上你唔使話比任何人聽, 包括你老闆, 但係如果你係公司管理層, 或者晌金融機構度做 (銀行, 證券行, 會計, 保險等等), 就一定要申報, 情況差到可能真係連工都無埋要轉行都唔定. 而如果你收入唔多, 又要租樓又有小朋友, 除非你搵三幾萬一個月, 若果人工大約萬幾, 都有幾大機會一毛錢都唔使比或者只要比二三千. 總比你一個月還萬幾輕鬆.

頭先有講話 IVA, 呢樣多數都要搵 CFP 或律師行搞, 但係 IVA 收的行政費非常多同非常貴, 可能做完之後你不過係由還一萬幾變成還八千 (實還六千, 有千幾係 IVA 行政費), 而且有可能 IVA 債權人唔接受都唔定, 到時你錢又比左(IVA要收差唔多兩萬收費, 仲要另外每月比行政費), 又 IVA 唔到, 仲要另外比錢破產你就真係超級大鑊喇.

仲有, 無論 IVA 定係破產, 有部份財務機構 (大部份大銀行, 幫聞), 只要你入紙申請, 就唔會搵人追數. 但係有少部份財務機構 (細銀行, 呀周聯合), 見到紙會仲追緊D, 至到正式出 IVA或者法庭已經宣佈當事人破產, 呢樣要有心理準備.

 生活  回應的RSS 按此回應  暫時未有引用通告   (0)

原則上晌呢度發表的文章我都會晌果邊發表, 不過因為果邊多D野可以玩, 希望大家會鍾意. 當然, 我希望大家兩邊都會睇啦, 因為呢邊易用好多呢.

就係呢度

 日記  回應的RSS 按此回應  暫時未有引用通告   (0)
2006年01月10日

後生時, 有好多夢想, 有好多希望, 而且仲有好多係不切實際.

我放棄左一個原本安逸舒適的地方, 去到風大浪大既地方, 戇居地尋找以為我可以分一杯羹既一片天. 我天真地嘗試好多成功率唔高既機會, 我無能地放走原本大好既機會, 我固執地守住一個近乎令我萬劫不復既機會, 我無奈地盡地一煲試一個自己其實興趣唔大既機會.

回首一看, 我其間實在傷害太多身邊的人, 朋友, 親人, 好多好多; 我發現原來我身邊原來仲有唔少朋友; 我發現原來我身邊有好多人渣都不如既人; 我發現我自己.

我真的太倦了….

我今日大病, 神智唔太清醒, 便由得我扮一次感性罷

 生活  回應的RSS 按此回應  暫時未有引用通告   (0)
2006年01月02日

香港人近乎買任何野都好似無知羊群一般, 大圍 hit 就唔理平貴都買左先, 跌到一個超平價反而無人敢入; 但係就係因為呢個分別, 細戶多數損手離場, 大戶經常會有賺. 但係我今次只係單單想講買樓.

家下仍在加息周期, 每次加息香港樓市總會跌一跌, 甚至可以成個屋苑一個月唔發市都夠膽死, 業主驚死自己間樓再跌多D於是主動落價求售, 準買家怕再加息每個月要供多D, 想賣賣唔出, 想買唔敢買, 一池死水; 但係我想問一個問題, 趁息口低果時買既買家, 今日比既係咩息咩? 無錯, 係今日既息口. 咁買樓既樓價呢? 係當日人人爭住買果時較高既樓價.

既然息口係常變既, 無論你買果時息口高定低, 都一樣會跟市場調整, 即係話你晌息口低果時買, 只係著數左息口較低果幾個月既息差, 以普羅大眾既百幾萬樓價計, 真正著數不過係幾千蚊之譜, 即係話息高同息低時買樓其實分別無大部份人所諗咁大分別, 息低時買樓亦唔會著數好多, 最緊要係銀行比你既利率係最優惠利率減幾多(依家好多都仲可以做到最優惠利率減2.25%或更低, 可以問想熟銀行或問多幾間).

至於樓價, 唔使我教, 既然息口原來無我地想像中影響咁大, 大家又知道晌邊一刻可以以較低價買到樓, 作為一個精明既買家, 邊一刻買可以賺得番息高果幾千蚊差額大家心照啦; 人求你買既感覺點都好過你求人賣, 係唔係

 生活  回應的RSS 回應(2)  暫時未有引用通告   (0)
2005年12月27日

還記得無耐之前, 兩個中五學生因為驚自己 “搞出人命”, 於是齊齊跳樓大家一命烏乎. 當時個個都討論佢地, 有人覺得佢地太傻, 有人覺得佢地太白痴, 有人覺得佢地唔死無用云云.

唔夠一個月, 除左佢地家人之外, 仲有邊個會關心佢地呢? 再講, 便會變成 out 精了.

回歸番最根本問題, 就咁死了之, 值唔值呢….

 日記  回應的RSS 按此回應  暫時未有引用通告   (0)
2005年12月21日