窮而又可以傲骨, 只可以晌古代發生.
以前D人窮極都好, 大不了咪乜都無. 無野食喎, 咪自己種D野食囉, 再唔係周山搵, 一定有D野可以食. 住是是旦旦求求其其山窿都可以. 窮, 唔使死, 甚至比起家下拎綜援既人生活更好.
家下所謂現代人, 唔食都十九幾萬樣費要交, 又唔可以周山搵野食, 又唔比亂咁種野食, 要搵個地方住更係費盡心神. 窮家下唔係”無”咁簡單, 而係一個無底深潭, 窮好多時只可以越來越窮, 窮令人能夠把握到既機會越來越少, 再變成負數….
我幾時先可以脫貧?
隨心
回應的RSS
按此回應
暫時未有引用通告
(0)
2005年11月14日
如果你儲蓄唔到咁上下大舊既錢, 根本無辦法可以做到似樣既投資; 你有咁上下投資先可以得到利潤繼而得到名聲先可以融資; 中小企如要再發大就要靠借貸先可以得到更多更大既機會.
美國佬唔鍾意儲蓄, 想買野就借錢買(分期/信用咭), 投資就要夠強積金之類既野去支持
中國人唔鍾意借錢, 又唔太好投資, 最鍾意儲錢, 於是經濟最需要活力既復蘇時期個個都仲係驚弓之鳥金融市場就好似一池死水
香港人未出到黎做野就借錢, 能夠儲到錢已經成卅勾, 幾時先可以有番咁大舊錢去投資?
以前晌香港創業好平, 你夠膽做就可以; 依家創業, 未開始做生意就有十九幾萬樣費要比, 仲要等呢個部門批果個部門批, 無番廿幾卅個都無可能做生意
香港政苦一邊話要幫中小企, 一邊又咁多所謂 “發達社會所必需之規管”, 如果唔夠錢就幫你去借錢, 變相增加生意風險, 香港又點可能發展到本土商業? 細公司卅萬 gross 又係比咁多, 大公司幾十億又係比咁多, 唉….
政府
回應的RSS
回應(2)
暫時未有引用通告
(0)
2005年11月13日
英國佬其實好易認
美國佬極端到唔係都市人就係乜都唔知既深山野人但係就硬係無乜性格, 法國佬永遠都懶洋洋去酒吧飲咖啡去cafe飲啤酒, 澳洲佬你硬係覺得佢老豆如果唔係樹熊就一定係袋鼠如果唔係D英文無可能會講到咁難聽
英國佬好死刻薄, 刻薄源自佢地對自己既自信加上思路既特別之處; 佢地懶洋洋但係總會有個譜, 同埋佢地會有一種自傲, 覺得自己高人一等 - 而且好多時佢地都會有咁既能耐.
可能殖民地時代生活太好, 相比當下社會果時真係太開心, 先會懷念以前, 先會對佢地印像咁好.
金融風暴好多人同當年特區政府講好話, 認為經驗不足所以處理得唔太好但係以一個咁新既政府黎講已經算係咁. 可惜我認為, 無能晌某D情況之下, 真係一種罪黎既….
肥彭, 我其實真係幾鍾意你
政治
回應的RSS
按此回應
暫時未有引用通告
(0)
2005年11月13日
細個時, 呀媽總會話 “有D人好似披著羊皮的狼”, 如果唔小心D, 一個唔覺意就連骨都無.
但係人越大, 出黎做野, 個個都會叫你做人唔可以咁純良, 即使你係羊你都要披著狼皮, 唔打得都睇得, 否則好難可以晌呢個社會生存云云.
久而久之, 所有羊都披著狼皮, 反而狼就披著羊皮.
又狼又羊為乜呢, 做一件貓咪好囉….
隨心
回應的RSS
按此回應
暫時未有引用通告
(0)
2005年11月13日
好多上開新聞組既人都會以為支惑天王係因為 “不誠實使用電腦” 呢條罪黎入佢三個月, 繼而話古惑天王根本無不誠實可言. “放種咋喎, 有幾唔誠實呀?”
另外有部份人又會話政府未就點對點軟件使用作出規管, 既然係咁, 你憑乜野拉人呀? 仲入人三個月? 咁仲有王法既?
當然, 仲有好多不甚理智之餘又無乜建設可言既發言, 例如大叫狗官, 或者用謝檸檬一案作比較去表示刑期過重, 甚至講到香港法律末落人治檯頭等等, 要幾不求甚解就有幾不求甚解.
呀古惑天王比人告既罪係 “損害電影製作商及發行商利益”, 意即政府指佢網上放種既行為係明顯地損害有關行業之商業利益, 引申出黎即係話呢種行為係會令有關行業減少投資於香港, 有損香港整體利益. 而呢條罪, 其實同告老番好類同, 所以有理由相信政府希望將放種等同老番, 咁就可以唔使改任何法例情況之下都可以告到放種既人之餘, 其他地區借此案作為案例亦唔使搞一大堆法律程序就可以拉人做野.
可能你會問, 政府使乜搞咁多野? 美國咁大個國家都告唔入, 晌香港告得入又如何? 咁你就錯喇.
正正就係因為美國告唔入, 所以先要去D告得入又叫做有法治可言既地方做野, 咁先有案例去美國告班友仔嘛, 如果唔係又晌美國搞, 搞得三五七年先搞到出黎, 到時可能又有D唔知咩技術出到黎, 科技快過法律幾代, 咁任你點搞都無用啦
事件
回應的RSS
按此回應
暫時未有引用通告
(0)
2005年11月07日
我睇到個CD cover, 第一樣想問就係, 呢個真係Charlotte Church????
一路聽, 一路發覺好唔對路, 佢點解會唱 pop? 佢點解會唱 soul? 佢點解會有咁既改變?
以佢既歌唱功力, 唱呢D歌根本手到拿來, 但係你見到莫華倫唱乜歌都係用同一個腔口去唱, 你可唔可以想像莫華倫可以唱到好似陶吉吉咁既感覺? 單單係呢一種”放下”已經非常吸引人. 雖然呢隻碟唔可以話好好好好聽, 但係絕對值得買一隻番黎, 齋睇Charlotte Church個look都抵
音樂
回應的RSS
按此回應
暫時未有引用通告
(0)
2005年10月31日
今日行過CD舖, 聽到有把聲唱 “十個救火的少年”, 把死人聲真係驚為天人, 講真晌卡拉OK去搵一個唱得好過佢地既真係一D都唔難; 一個連歌都唱唔好既歌手, 其實同計盤數計到一pat屎既會計, 或者傷風感冒都可以醫死人既庸醫有乜分別? 連自己專業都做唔好仲叫人包容?
至於有人話某D唱得超勁爆咁差既人好有作曲作詞既才華, 唔應該全盤否定佢地云云, fine, 你咪去做幕後囉, 你老味你唔唱得走出黎獻世把X咩, 收檔啦.
作曲作詞出色唔代表你唱歌好聽, 你唱得好亦唔代表你D所謂創作真係見得人, 但係班友仔好似唔太明呢個道理, 亂X咁黎, 呀豬呀狗都出CD, 真係連tb都嫌阻定
音樂
回應的RSS
回應(2)
暫時未有引用通告
(0)
2005年10月30日
