士安力的蛇貓狗

我唔係劉德華影迷, 甚至有D討厭佢一向以來故作靚仔既演技 (而且佢真係靚仔過我, 更令人討厭), 但係佢近呢幾年拍既戲真係相當唔錯, 呢套係其中之一.

細路永遠覺得自己身體太少能力太少權力太少; 大人永遠覺得自己負擔太多選擇太多遺憾太多. 大人變細路變相多左時間心境其實都會變番做細路; 細路變大人變相燒走自己時間心境亦會變老.

個故仔其實好簡單, 一個小朋友, 對家庭不滿, 想變成大人, 希望可以從此獨立, 點知唔單止真係變左做大人, 燒時間速度仍然無慢到, 三幾日就變左做個呀伯, 晌呢幾日佢忽然明白好多佢仲係小朋友既時候唔明白唔理解亦唔既事情, 但係一個呀伯仲可以做到D乜呢?

我係一個麻甩佬, 代入唔到莫文蔚果個角色, 但係黃日華林家楝果種麻甩佬既無奈, 牛華變成大人再變成呀伯果種由超級開心興奮到追趕時間既心情, 唔多唔少都感染到我. 我都不時會諗起好多人, 想同好多人講對唔住, 但係一來搵唔佢地而且見到佢地都唔知可以做到D乜.

牛華 “有時間” 可以對莫文蔚講對唔住, 但係我地又 “有無時間” 搵番我地既過去去面對呢….

 電影  回應的RSS 按此回應  暫時未有引用通告   (0)
2005年12月19日

邊個係靚女? 當然係細果個啦

 家庭  回應的RSS 按此回應  暫時未有引用通告   (0)
2005年12月12日

睇公仔箱, 輪米既老人家來自唔同階層, 懷著各自目的, 有部份想拎意頭, 有部份因為貪心, 有部份會去晒所有輪米盛會意圖晌呢個輪米月份輪晒成年要食既米番屋企

輪米既固得睇得人驚心動魄, 派米既主辦機構冷血得令人不安

我唔係批評佢地人手安排出問題, 而係佢地竟然會認為人山人海咁多人黎輪米, 佢地先有面子, 夠豪氣, 你果邊派一斤我派夠兩斤, 你派三斤我直頭一包五公斤金象派出去, 問你死未

好喇, 家下終於有件呀閃瓜左, 無論係直接定間接都好, 輪米呢個活動一定係果個呀閃瓜柴既主要原因. 難得有人面口轉得快過D政棍轉車太, “呢個呀婆自己跌到, 仲要唔係晌我地排隊既範圍之中, 差少少架, 唔好入我地數呀”, 佢地咁負責任既態度實為香港下一代樹主一個良好榜讓.

政府決定以後租康文處地方派米, 派米一包唔可以過一公斤, 又要買第三者保險, 唔知呢D沽名釣譽之徒下年會晌邊度派

 事件  回應的RSS 按此回應  暫時未有引用通告   (0)
2005年12月09日

十幾年前, 我都係一個中學生

我記憶所及, 大部份同學都相當地認同娛樂媒體所傳播既愛情觀; 強烈, 厭世, 甚至認為死得好似好轟烈係一件可歌可泣既事. 我當其時相當地討厭佢地咁樣, 我同我班入面既情況相當地唔好, 我覺得佢地白痴, 佢地覺得我扮野.

將事件搞到轟轟烈烈咁, 無錯, 對當事人身邊所有人, 包括朋友親人, 都係一個好大既衝擊, 之但係對於我呢D唔關事既人黎講, 你死左, 又與我何干呢?

對思想唔係咁成熟既人黎講, 壓力唔識得處理, 聽埋聽埋D歌, 睇埋睇埋D小說, 以為一死真係可以解決問題, 至少可以逃避問題, 佢自己目的達到左, 但係係用數個甚至數十個人一生既遺憾, 再加埋自己條命換番黎, 值得咩?

人越大, 越發覺家人對自己係幾咁重要, 希望我唔會發覺得太遲

 時事/新聞  回應的RSS 按此回應  暫時未有引用通告   (0)

強積金最早開始計劃可以推到去82年, 因為當年有人已經預見香港長遠發展一定要解決退休呢個計時炸彈, 去到92-93年成個部處已經完成, 咁既然計劃完成, 咁點解唔推行呢? 發生左D乜野事要搞到幾年之後先開始呢? 呢個留待大家去搵答案.

我捫心自問, 呢個社會係唔公平既, 付出同等努力唔一定有同樣收獲. 即使堅持令到社會變得公平都好, 都總會有D人比大部份普通人 “更加公平”.

我不過係一個窮到反艇既升斗小市民, 但係我既經驗話比我知, 原來有時明益D有錢佬, 我呢D小市民反而會搵得多D, 生活好D.

我唔相信終極既民主會令社會變得更好, 香港好多反面教材令我更確信呢樣野.

一句 “強積金都要成廿年先實行到啦” 可以扭曲成無誠意推出政改時間表, 我真係唔知呢D係乜野人, 都算喇, D人仲要信先至令人不安.

完全忽視現實情況, 以美麗既說話去包裝自己, 令其他人成全自己, 令自己變成烈士, 再將一大堆唔關事既野攬晒上身認晒投之後樂於被人視為英雄, 其實本質上同恐怖份子有乜分別….

對我黎講, 即使政改原地踏步都無所謂, 但係下下同中共鬧到面經耳赤唔通咁又叫好? 見到對方態度軟化就不停去衝擊對方底線唔通又可以解決問題?

唉

 隨心  回應的RSS 按此回應  暫時未有引用通告   (0)
2005年12月03日

政改對部份人黎講好重要: 1)如果唔搵D野黎鬧就會無飯開既政棍, 2)比政棍撥得幾撥就覺得政改好重要但係點解咁重要其實都唔太清楚既人, 3)真係覺得政改比起開飯更緊要既人, 4)土共/左仔, 5)急於向北大人交心既人, 因為呢次交心可能帶來數以億計既商機, 6)士可殺不可辱今日開飯都未搞掂但係擔心自己仔女將來人權自由問題既偉人父母

政改對部份人黎講無乜關係: 1)連開飯都有問題既人, 2)晌可見將來自己開飯會有問題既人, 3)明明話經濟好左但係唔知點解收入少左既人, 4)明明話經濟好左收入又多左但係仲手緊過以前既人

政改關乎政治, 無錯真係會對全港市民都有影響, 但係對好多早出晚歸既打工仔黎講, 民主進程, 有進步無倒退其實已經好滿意, 甚至保持現狀對部份人黎講亦唔會有乜異議, 至於乜野春春時間表, 又要幾時幾時要咁咁咁咁咁, 又想呢樣又要果樣, 下下都同中央鬧到大家面左左, 為乜呢?

可能有D人唔想承認, 但係香港真係中國一部份, 中央政府先係 “頂頭呀頭”, 佢真係要霸王硬上弓, 香港真係無辦法可言架喎. 點解以前英國佬時代就唔出聲, 今日中國人時代先至鬼打鬼呢?

有人講過, 政治係一門妥協既藝術, 平衡各方利益令最多人感到滿意先係最終目的, 還看今日香港, 有邊個係晌度尋求雙贏而唔係好似一隻無性既狗晌度得個吠字?

 政治  回應的RSS 回應(3)  暫時未有引用通告   (0)
2005年12月02日

你問我為何今天會這樣
我問你為何今天你仍這樣

你問我今天還可以做甚麽
我問你今天我還可以做甚麽

你問我今天何以成了幻影
我問你當天何以你把我當成幻影

工程最怕爛尾, 因為會蝕錢
人生最怕爛尾, 因為會比蝕錢更大劑

大家已經成年, 唔好再發癲

 秘密  回應的RSS 按此回應  暫時未有引用通告   (0)
2005年12月01日